Göngugötur 2019

Opnað var fyrir göngugötur 1. maí 2019.

  • Laugavegur og Bankastræti frá Klapparstíg að Þingholtsstræti
  • Skólavörðustígur milli Bergstaðastrætis og Laugavegar
  • Pósthússtræti milli Kirkjustrætis og Hafnarstrætis
  • Austurstræti ásamt Veltusundi og Vallarstræti

Göturnar verða opnar fyrir vöruafgreiðslu kl. 07.00 til 11.00 virka daga og kl. 08.00 til 11.00 á laugardögum en annars lokaðar fyrir allri almennri umferð á tímabilinu.

Í bílahúsum miðborgarinnar, þ.m.t. Hafnartorgi og Hörpu, eru alls 1939 stæði og heildarfjöldi bílastæða sem lokast á göngugötusvæði eru 21.

Göngugötur skref fyrir skef

Umhverfis- og skipulagssvið vinnur að undirbúningi á göngugötum í áföngum og í samráði við hagsmunaaðila. Það er í samræmi við samþykkt borgarstjórnar þann 4. september 2018 um göngugötur allt árið.

  • Göngugötur 2019 verða frá Klapparstíg að Þingholtsstræti
  • Svæðið frá Klapparstíg að Þingholtsstræti er áætlað sem fyrsti áfangi í átt að varanlegri göngugötu og framkvæmdir áætlaðar árið 2020
  • Framkvæmdir á Hverfisgötu gera það að verkum að göngugötusvæði 2019 er styttra en það var árið 2018 en hluti af Ingólfsstræti verður einnig göngugata á meðan á framkvæmdum stendur
  • Til að dreifa betur umferð er lagt til að breyta akstursstefnu frá Klapparstíg að Frakkastíg

Breytingin yfir í göngugötur verður áfangaskipt og verða drög að forhönnun á fyrsta áfanga lögð fyrir skipulags og samgönguráð haustið 2019. Forhönnun felur í sér útfærslur á hinum ýmsu lausnum til að bæta götuna og umhverfið. Má þar nefna aðgangsstýringar, eitt yfirborð, bætt aðgengi, leiðilínur og aðgengi inn í verslanir, dvalarsvæði og götugögn, lýsing og fjölgun stæða fyrir hreyfihamlað fólk.

 

Svæði til skoðunar fyrir varanlegar göngugötur

  • Göngugötusvæðið til framtíðar liggur á milli Lækjargötu og Snorrabrautar
  • Á göngugötusvæðinu eru alls 328 bílastæði í Traðarkoti og á Bergstöðum. Með stæðum í Kolaporti og Hafnartorgi eru þetta alls 744 bílastæði. Samtals eru í miðborginni 1939 bílastæði í bílahúsum
  • Bílastæðum fyrir hreyfihamlaða verður bætt við í hliðargötum eða sem næst göngugötuhliðunum
  • Klapparstígur að Frakkastíg er næsti áfangi í verkefninu um göngugötur.
  • Bílahúsið Vitatorg er með 223 stæði og Stjörnuport með 191 stæði
  • 3. áfangi er fyrirhugaður frá Frakkastíg að Barónsstíg

Laugavegur hefur frá fyrstu tíð verið iðandi af mannlífi. Í árdaga áður en bíllinn kom til sögunnar voru íbúar gangandi eða á hestum á Laugavegi annað hvort á leið til og frá vinnu eða við dagleg störf. Gjarnan nýttu vegfarendur tækifærið til að versla, fara í banka eða annarra erinda. Laugavegur hefur ávallt verið verslunarrými og farið í gegnum umbreytingatímabil bæði með tilkomu bíla og breyttra verslunarhátta. Enn þann dag í dag er Laugavegurinn sú gata borgarinnar þar sem flestir gangandi vegfarendur fara um daglega.

Hvers vegna göngugötur?

Göngugötur eru sá áfangastaður borga sem flestir heimsækja til þess að dvelja á. Göngugötur efla samskipti og auka lífsgæði borgarbúa. Flestir sem fara um Laugaveg gera það fótgangandi en umferð bifreiða er einnig mikil en þeim fylgir mengun af völdum útblásturs og svifryks. Göngugötur eru eðlilegur áfangi í þróun borga og hefur reynslan sýnt að íbúar borga vilja göngugötu í miðborgum.

Hvaða áhrif hafa göngugötur á verslun?

Í nágrannalöndum okkar hefur verslun aukist við gönguvæðingu. Við göngugötur þrífst jafnan blómleg verslun við þá sem eiga greitt aðgengi að þeim í rólegu umhverfi. Við Laugaveg eru fjölbreyttar verslanir og veitingastaðir og eykur það verulega  mannlíf yfir allan sólarhringinn.

Hvað með veðrið?         

Frá 1960 hafa göngugötur verið opnaðar víða í Skandinavíu. Þessar göngugötur eru í nánast hverjum dönskum, norskum og sænskum bæ óháð stærð, staðsetningu eða veðurfari. Hvorki regn, kuldi, né vindur hefur hamlað þessari þróun. Rannsóknir hafa sýnt að sami fjöldi gesta kemur á öllum árstíðum á þessar götur óháð veðri.

Hvar á ég að leggja?

Það er ódýrast að leggja í stæði í bílahúsum, Stjörnuport, Vitatorg og Traðarkot eru næst Laugavegi. En í nágrenninu eru enn fleiri hús þar sem hægt er að finna stæði. Alls eru stæðin 1394 í bílahúsum í miðborginni. http://bilastaedasjodur.is

Hvað með þá sem eiga erfitt með gang?

Bílastæðum fyrir hreyfihamlaða er komið fyrir á hliðargötum næst göngugötum en einnig er til skoðunar hvort setja skuli P-stæði inn á svæðið. Helstu hindranir á Laugavegi hefur verið aðgengi inn í verslanarými á jarðhæðum. Tröppur og aðrar misfellur geta verið mikill farartálmi en með göngugötum verður hægt að leysa slíkt með því að slétta yfirborð og hækka götuna. Einnig gefst færi til að útbúa rampa þegar meira rými myndast með tilkomu göngugötu en nú er.

Hvað með vörulosun?

Vörulosun er vandasöm á Laugavegi, rými fyrir stóra flutningabíla er lítið og vandkvæðum bundið að leggja við götuna á annatíma. Með því að breyta Laugavegi í göngugötu verður gatan opin fyrir vöruflutningaraðila milli 7-11 á morgnana. Þá er rýmið laust við almenna umferð og bíla í bílastæðum sem eru hamlandi. Vörulosunaraðilar geta því lagt bílum sínum nær áfangastað sem flýtir fyrir og auðveldar vöruflutning um götuna til muna.

Hvað með íbúa við göngugötur?

Íbúar með stæði inn á lóðum við göngugötur geta fengið leyfi til að aka um göngugötur en aðgangi verður stýrt um rafdrifna polla. Við sérstakar aðstæður geta íbúar einnig fengið afnot af göturýminu utan tilskilins vöruflutningatíma t.d. ef staðið er í flutningum, viðgerðum á húseign o.s.frv.

Hvað með neyðarakstur? lögregla, sjúkraflutningar og slökkvilið?

Viðbragðsaðilar hafa ætið aðgang að svæðinu og fá aðgang í gegnum rafdrifna polla.